LAOAG CITY – Inpetteng ni Julius Laureta, agtawen iti 32, taga Barangay Santiago ngem agnanaed iti Barangay Manalpac, Solsona, Ilocos Norte a saanna a kukua ti droga a naala kenkuana bayat iti drug buy-bust operation ti nasao nga ili.
Iti interview ti Bombo Radyo Laoag ken ni Laureta, inlawlawag na nga aggapo da ti kabsat na a babai iti Barangay Santiago ken agawid da koman iti Barangay Santiago ngem dimmagas sa ti sidaen da iti sentro ti nasao nga ili.
Inbatad na a bayat ti panangur-uray na ti kabsat na a babai a napan gimmatang ti sidaen da ket maipagarop nga adda lattan ti immasideg kenkuana ket rinimpong ken adda ti inpilit da nga ipabulsa kenkuana ngem inpurwak na daytoy.
Inadmitir ni Laureta a dati daytoy a drug surrenderer ngem nagbalbaliwen.
Kinarit na pay dagiti otoridad nga ipa-drugtest da daytoy ken no mapaneknekan da nga agus-usar pay laeng ti illegal a droga ket uray paltugan dan.
Immuna ti daytoy, nakaala dagiti otoridad iti ikot ni Laureta ti maysa a sachet a naglaon ti maipagarop a shabu, 500 a marked money ken ti personal a kwarta na a 240 a pisos.
Mainaig iti daytoy, kinontra ni SPO4 Eufemia Maybel Pascua, OIC iti PNP-Solsona ti alegasyon ni Julius Laureta kadagiti kameng ti pulisya.
Daytoy ket mainaig ti maipagarop a panangpabulsa dagiti kameng ti pulisya ti droga ken ni Laureta bayat iti inyuswat da a drug buy-bust operation.
Inpetteng ni Pascua a naipagagangayen ti kastoy nga ibagbaga dagiti matiltiliw da iti operasyon.
Inlawlawag ni Pascua nga adda dagiti informants da a nangkumpirmar nga agtultuloy pay laeng iti illegal nga aktibidad ni Laureta isut gapuna a nangiyuswat da ti surveillance.
Kabayatanna, nakigtot ti ama ni Julius Laureta a ni Mr. Jimmy Laureta iti Barangay Manalpac ti nasao nga ili kalpasan a naipakaammo kenkuana ti pannakatiliw ti anak na.
Kuna na a mapaneknekan na a naminpinsanen a tinallikudan ti anak na ti panagus-usar na idi iti illegal a droga.
