LAOAG CITY – Nagballigi dagiti otoridad ti inyuswat da a drug-buy bust operation idiay Barangay Bungon, Batac City.
Binigbig ni Police Supt. Marlon Paiste, chief of police ti PNP-Batac ti suspek a ni Anthony Estavillo y Gorgonia, agtawen ti 27, awanan ti asawa, awanan ti trabaho ken residente met laeng ti nasao a lugar.
Naala ti ikot ni Estavillo ti 2 a sachet a naglaon ti maipagarop a shabu ken ti sangaribo a pisos a nausar ti operasyon.
Kinumpirmaran ni Paiste a ti nasao a suspek ket addan ti immuna a sinango na a kaso a panaglabsing ti Republic Act 9165 wenno illegal a panaglako ken panagusar ti maipawil a droga idi 2013.
Nupay kasta, nawaya-wayaan laeng ti suspek ita a tawen kalpasan a nakapagpiyansa.
Iti agdama, inpakaammo ni Paiste nga isagsagana dan dagiti dokumento para ti panangipila da ti kaso kontra ken ni Estavillo.
