LAOAG CITY – Maisagsaganan ti kaso a maipila kontra ti natiliw a suspek a ni Alan Rabang, maysa nga street levet target iti naiwayat a search operation iti pagtaengan na ti Brgy. 21 San Agustin iti ili ti San Nicolas.
Daytoy ket iti panaglabsing ti RA 9165 wenno Comprehensive Dangerous Drugs Act of 2002 ken ti RA 10591 wenno Comprehensive laws on Firearms and Ammunition.
Nakumpiskar dagiti otoridad ti tallo nga small sachet a naglaon ti maipagarup a shabu, maysa a kalibre 38 a paltog, ken innem a bala.
Mainaig iti daytoy, kuna ni Barangay Kagawad Mercy Racquel iti nasao a barangay nga awan ti ammo na a pakaidamdamagan ni Rabang.
Inbatad na a naamuan na laeng a drug personality ni Rabang babaen ti panagsuko na itay kallabes.
Innayon na idi tiliwen dagiti pulis ket saan a nagkedked ni Rabang.
Immuna nga inpetteng ti pamilya ni Rabang a naimula dagiti nakumpiskar dagiti otoridad.
