LAOAG CITY – Natiliw ti maysa a suspek a nagpaputok ti paltog babaen dagiti pannakabagi ti linteg iti ili ti Nueva Era.
Iti report manipud ti PNP Nueva Era, nabigbig ti suspek a ni Albrendo Remedios y Dagdagan, agtawen ti 55, awanan ti asawa, ken residente iti Brgy. Cabittauran iti nasao nga ili.
Iti inisyal nga imbestigasyon, nakaawat dagiti otoridad ti tawag manipud kenni Jessa Pompa, a mangipakpakaammo ti panagprobokar ken panagpaputok ti suspek usar ti ikot na a paltog.
Basar iti PNP, kinomprontar da Juliana Remedios nga ina ti suspek, Harold Pompa, Marilyn Pompa a kabsat ti suspek, kenni Jessa Pompa ti suspek panggep iti daga.
Dati a simrek ti suspek iti pagtaengan na tapno alaen ti paltog na ken kellaat nga inpaputok na kadagiti maseknan.
Dagus nga inpan ni Remedios ti paltog na iti compartment ti motorsiklo a bulon na ti naglugan ken nagtalimpuagaw.
Nupay kasta, nagsubli met laeng ti suspek iti pagtaengan da ken dagus a dimteng dagiti otoridad ket dita a narekobre da ti maysa nga smith and wesson caliber 38 revolver nga addaan ti nakaipan a lima a bala ken maysa a kapsula.
Nagtalianed iti kustudyar ti PNP Nueva Era ti suspek ken maisagsaganan dagiti maipila a reklamo kontra kenkuana.
