LAOAG CTY – Natiliw ti maysa a lalaki kalpasan ti panangtutok na ti paltog iti live-in partner na iti Barangay 2 ditoy ciudad ti Laoag.
Nabigbig ti suspek a ni Jonel Domingo Areola, agtawen ti 39 ken residente iti Barangay Elizabeth iti ili ti Dingras idinto a ti biktima ket ni Rosemarie Cres Miguel Calsada, agtawen ti 42 ken residente met iti Barangay 2, Laoag City.
Segun kenni Police Lt. Col. Joseph Baltazar, chief of police ti Philippine National Police ditoy ciudad ti Laoag, idi simmangpet ti biktima a nakalugan ti Nissan Navara nga agmaris ti puraw ken dagus nga inasitgan ti suspek ken intutok na ti 9MM a paltog ken nagsao ti dakes ken dinamag no no sadinno ti naggapoan ti babai.
Inlawlawag na a ginandat ti biktima ti aglibas ngem tinutukan manen ti suspek agingga a napan ti suspek iti sangwanan ti behikulo ken inputok na ti paltog na iti baba ken ginundawayan metten ti biktima nga aglibas ken nagturong iti daya.
Inbatad na nga iti inyuswat nga hot pursuit operation dagiti otoridad iti nadakamat a barangay, natiliw da ti suspek ken positibo a binigbig ti biktima daytoy.
Kunana pay a nakarekobre dagiti otoridad iti nakapasamakan ti insidente ti maysa a kapsula ken naala iti ikot ti suspek ti 14,250 pesos, dua a pidaso ti 5 Singaporean dollar, dua a pidaso ti 2 singaporean dollar, nagduduma nga ID, dokumento ti paltog a nakainagan ken ni Rosemarie Calsada, Firearam registration, dua a vape ken maysa a wallet.
Narekobre pay iti lugan nga inusar ti suspek ti 9MM caliber a paltog nga addaan ti bala ken maysa a magazine nga addaan ti pito a bala ti 9MM a paltog.
Kabayatanna, kuna ni a mapilaan ti kaso a grave threat ken alarm and scandal ti suspek ken adalen da pay no mabalin da a pilaan ti Illegal Possession of Firearms gapo ta ipaberipikar da pay no addaan ti LTOPF ti suspek.
Iti agdama, ti suspek ket adda iti kustudiyar ti Philippine National Police – Laoag.
