LAOAG CITY – Napilaanen ti kaso a panaglabsing iti Republic Act (RA)9165 wenno Comprehensive Dangerous Drugs Act of 2002 ni Meckie Jeuv Juan a taga Barangay Baay iti ciudad ti Batac.
Daytoy ti kinumpirmaran ni Police Chief Inspector Roldan Suitos, ti chief of police iti ili a Sarrat.
Ni Juan ket natiliw iti maysa a checkpoint iti paset ti Barangay 5 ti nasao nga ili ken naalaan iti napagango a bulong ti marijuana iti likud ti cellphone ti nasao a suspek.
Malaksid ti daytoy, nakakumpiskar pay dagiti otoridad iti marijuana a nailukot iti papel ken naikabil iti ziplock, karaman ti lighter, lima nga stick ti sigarilyo ken cellphone.
Inpasingked ni Suitos ti ad-adda pay a panangpaiget da ti iyuswat da a checkpoint tapno matiliw dagiti agik-ikot iti illegal a banag.
