LAOAG CITY – Natukkol iti saka ti driver ti kurong-kurong iti napasamak a karambola dagiti 4 a lugan iti Brgy. 20 San Jose iti ili ti Sarrat.
Nabigbig ti driver ti kurong-kurong a ni Jayson Pasion y Cuizon a residente iti Brgy. Pacifico iti ili ti Marcos; Silvia lalaine Grace Foronda y Leano, driver ti Toyota Corola ken residente iti Brgy Laureta iti ili a Solsona; ken ti driver ti Mitsubishi Expander ket ni Major Louie Nicolas y Aguinaldo, kameng ti Philippine Army ken residente iti Apt. Camp Gen Mateo Sampaloc, Tanay, Rizal.
Basar iti imbestigasyon, bayat nga agpababa iti national highway ti kurong-kurong a nagkarga iti softdrinks ket apaman nga agovertake iti sarsarunuen na a Toyota Corolla ket dita a kinnasinnabat na iti Mitsubishi Expander.
Gapu iti daytoy, naglisi ti kurong-kurong ken nadungpar na ti tricycle ni Edgar Rasos y Delos Eyes, residente iti Brgy. 1 iti nasao nga ili a nakaparada iti igid ti kalsada idinto a nadungpar ti Expander iti nasao a Corolla.
Naitaray iti ospital ti driver ti kurong-kurong kalpasan a natukkol ti akin kannigid a saka na.
