LAOAG CITY – Natukkol ti akin kannigid a saka ti driver ti motosiklo kalpasan a nakisinnabat ti maysa a tricycle iti Brgy. 22 San Cristobal iti ili ti Sarrat.
Nabigbig ti biktima a ni Rocky Ramos y Agustin, agtawen 19, residente iti Brgy. Bagut iti ili ti Dingras idinto a ti driver ti tricycle ket ni Andres Ramos Jr y Ballesteros, agtawen ti 58, ken residente iti Brgy. 19 Sto. Thomas iti ili ti Sarrat.
Basar iti imbestigasyon ti PNP Sarrat, agpapalaud a direksiyon ti tricycle ken nagovertake iti sarsarunuen na a pick-up.
Kellaat a nakadinnungpar ti tricycle ti motorsiklo nga inturong ti biktima bayat nga agpadpadaya iti nasao a kalsada.
Dagus a naitaray dagiti biktima iti ospital babaen ti panagresponde dagiti otoridad.
Maipagarup nga adda iti impluwensya ti nasanger ti tricycle driver idi mapasamak ti desgrasya.
Iti agdama, addan iti nasayaat a kasasaad dagiti dua a driver.
