LAOAG CITY – Maysa nga agtawen iti 86 nga Sports Commentator idiay Turkey ti nakagun-od ti world record gapu iti innem a dekada a career-na.
Kinumpirmaran ti records keeping organization a Guinness World Records a ni Orhan Ayhan ti baro a record holder ti titulo a ‘Longest Career as a Sports Commentator’ gapu iti 61 a tawenna a panagtrabaho kas commentator kadagiti nagduduma nga sports manipud idi 1963 agingga iti agdama.
Ti event nga immuna daytoy a nagbalin nga sports commentator ket idi Enero 1963 no sadino naglaban ti Turkey ken Italy idiay European Cup football match. Iti radyo pay laeng isuna idi a nag-commentator gapu ta awan met pay idi ti television broadcast idiay Turkey.
Naammoan a dagiti napapateg nga sporting events a na-cover daytoy ket dagiti boxing events iti Olympics idi 1972, 1996, 2000, 2004, 2008 ken 2012. Nagbalin a commentator pay isuna kadagiti World Cup football match idi 1994 ken 2002.
Malaksid iti panagbalinna a commentator ket sports columnist pay isuna kadagiti sumagmamano a diyaryo idiay Turkey.
