LAOAG CITY – Isagsaganan ti PNP-Pasuquin ti kaso a panagsalungasing iti RA 10591 wenno “Comprehensive Firearms and Ammunition Regulation Act“ ken RA 9156 kontra ken ni Mario Tangonan iti Bgy. Pangil ti nasao nga ili.
Segun ken ni P/C/Insp. Joseph Baltazar, Hepe ti Pulisya ti nasao nga ili, daytoy ket kalpasan a nagballaigi ti search warrant operations nga inwayat da kontra iti nasao a supek.
Kuna ni Baltazar, kas resulta ti nasao nga operasyon, nakaala da iti maysa a kalibre 38 nga addaan ti 5 a bala, 5 a bala para iti 7.52 a paltog ken 2 a plastic sachet a naglaon iti maataap a shabu.
Inadmitir ni Baltazar a paltog ken bala ti subject iti nasao nga operasyon ngem adda metten ti naala da a maipagarup a maipawil a droga iti nasao nga operasyon.
Kuna pay ni Baltazar a ni Tangonan ket maibilang a drug personality ken nairamraman iti kaso ti pammaltog iti agapelyedo ti Cardona itay kallabes.
Mainaig iti daytoy, inbatad ni Baltazar, Hepe a kitaen da no adda panakainaig ni Tangonan kadagiti pupulitiko ken dagiti criminal gang iti nasao nga ili.
Segun ken ni Baltazar, masapul a makita no ania ti koneksiyon wenno link ni Tangonan kadagiti criminal a grupo kas iti Calilan Criminal Gang.
Kuna na a babaen iti daytoy ket maamwan no adda koneksiyon na kadagiti nasao a grupo tapno masiputan dagiti posible a kakadwa na.
Innayon ni Baltazar nga itultuloy da ti narugyandan ken napaigetaan a kampanya kontra iti klase ti illegal iti ili ti Pasuquin.
