LAOAG CITY – Nagsagaba ti sugat ti nagduduma a paset ti bagi ti maysa a lalaki kalpasan a nadesgrasya ti inturong na a motorsiklo iti paset ti Batac-Sarrat road bisinidad ti Brgy. Rayuray iti ciudad ti Batac.
Binigbig ni Police Major Artemio Clemente, OIC iti PNP-Batac ti biktima a ni James Paul Manglan-lan y Cariaga, agtawen ti 22, baro ken residente iti Brgy. 30 Baoa-West ti nasao a ciudad.
Inbaga na nga iti imbestigasyon, kabayatan ti panagpapa-amyanan a direksyon ti biktima ket nadungpar na dagiti nabunton a batbato ken darat iti igid ti kalsada isut gapuna a napukawan ti control a nagresulta ti pannakatulid na iti semento.
Inpakaammo ni Clemente a ti driver ti motorsiklo ket positibo a nakainom ti arak idi napasamak ti insidente.
Naduktalan da pay a ti nasao a biktima ket adda ti sakit na nga epilepsy.
Naitaray ti biktima iti Mariano Marcos Memorial Hospital and Medical Center (MMMH&MC) iti ciudad ti Batac para iti pannakaagas na.
