LAOAG CITY – Maysa a lalaki idiay Barcelona, Spain a mahilig iti cell phone ti nakagun-od ti world record gapu iti dakkel a koleksionna kadagiti nagduduma a klase ti cell phones.
Kinumpirmaran ti records keeping organization a Guinness World Records a ni Wences Palau Fernandez ti baro a world record holder ti titulo a “Largest Collection of Mobile Phones.”
Daytoy ket kalpasan a nakakolektar ti 3,615 a pedaso ti cell phones.
Inbatad ni Fernandez, ti kaunaan a cell phone-na ket Nokia 3210 a regalo kenkuana manipud kadagiti nagannakna idi paskua ti 1999.
Apaman a nadanon ti 2008 ket nangrugin isuna nga agkolektar ti Nokia phones a saanna a nagatang idi ubing pay daytoy.
Nupay kasta saan a nagbayag, nagkolektaren isuna kadagiti cell phone manipud kadagiti nagduduma a brand.
Naammoan a maysa kadagiti ipanpannakkel a cell phone ni Fernandez iti koleksion ket ti Yoda, Starfighter, Obi-Wan Kenobi, Cyborg and Padawan version ti Nokia 3220 manipud iti limited edition Star Wars Episode III collection.
