LAOAG CITY – Agtultuloy a mabirbirok ti maysa a lalaki nga agan-anup kalpasan a natnag iti nauneg a paset ti kabanbantayan iti Mount Maguinaray a nagbedngan ti Ilocos Norte ken Abra.
Segun ken ni Mr. Antonio Pugyao, adda ti tallo a lallaki ti nagkakadua a napan naganup iti kabanbantayan iti nasao a lugar.
Inbatadna a nakaawat isuna ti tawag manipud iti maysa kadakuada a nangipakaammo kenkuana a natnag ti maysa dagiti kaduada.
Gapu iti daytoy, kunana nga insigida a nangbukelda ti grupo nga agarup 10 nga indibidual tapno agresponde ken biruken ti maseknan a lalaki a nabigbig a ni Gringo Barit, naasawaan, adda ti umno a tawen ken residente met laeng iti nasao a lugar.
Inlawlawagna a sumagmamano nga oras a binirbirukda ti kabarangayanda ngem saanda daytoy a nakita agingga a simmipngeten ti tangatang isu a nagdesisionda nga isardengen ken ituloy iti kabigatanna.
Naammoan a daytoy ti umuna a gundaway nga adda ti napasamak a pannakatnag dagiti residente kabayatan ti panaganup dagitoy iti kabanbantayan a kangrunaan a pagbiaganda.
Kabayatanna, bayat a maisursurat daytoy a damag ket saan pay a nabirukan dagiti otoridad ti nasao a lalaki.
