LAOAG CITY – Natiliw ti maysa a lalaki kalpasan ti naiyuswat a drug buy bust operation babaen ti Philippine Drug Enforcement Unit (PDUE) nga idadaulwan ni Police Chief Master Sergeant Harold Nicolas ken ti koordinasyon ti PNP-Piddig iti Barangay 2, Anao iti nasao nga ili.
Nabigbig daytoy a ni Wilbur Jacinto y Badis alyas Boying, aglaklako ti ukay-ukay ken residente iti Barangay San Esteban iti ili ti Dingras.
Naala dagiti otoridad ti maysa a plastic sachet ti naglaon ti maipagarop a shabu iti ikot ni Jacinto, sangaribo a pisos a marked money, 1280 a pisos, ken maysa a lighter; sabali pay ti maysa a sachet ti maatap a shabu nga agbalor ti sangaribo a pisos a nagatang ti police pusuer buyer.
Mainaig iti daytoy, naglikudan ni Jacinto a kukua na dagiti dua a sachet ti maipagarop a shabu rason a kiniddaw na a maibasura ti kaso a maipila kontra kenkuana.
Inadmitir met ni Jacinto a dati nga agus-usar ti iligal a droga ngem awan a tawen ti napalabas ken nagbalbaliwen.
Segun kenni Nicolas, karbengan ni Jacinto a mangibaga a saan na a kukua dagiti naala kenkuana a droga, ken agsungbat to lattan iti korte.
Inbatad na nga idi kuma kalman ti transaksyon ngem intantan ni Jacinto ita nga aldaw rason a nangiwayat da ti operasyon.
Naamoan a ni Jacinto ket agop-operar iti ili ti Dingras, Sarrat ken Piddig.
