LAOAG CITY – Inpakaammo ni PSSgt. Seymour Belarmino, ti Duty Desk Officer ti Philippine National Police ditoy Siudad ti Laoag nga adda ti maysa a lalaki ti nanggandat nga agpakamatay iti Sitio 4, Brgy. 32-B, La Paz West ditoy Siudad.
Binigbig ni Belarmino ti maseknan nga agtawen ti 22 ken residente iti nasao a Barangay.
Inbatadna a basar iti naisayangkat nga imbestigasion, agarup 7:30 ti rabii idi kalman ket nagresponde dagiti kameng ti pulisia ken ti DPS Laoag Paramedics iti nadakamat a Barangay kangrunaanna iti manarimaan a maipaspasdek a pagtaengan da Joel Antonio y Toribio, agtawen ti 37, naasawaan ken residente ti nasao met laeng a Barangay.
Inlawlawagna nga agarup 7:20 ti rabii di kalman, bayat nga adda iti uneg ni Antonio iti maar-aramid a pagtaenganda ket kellaat a simrek iti pagtaenganda ti maseknan ken dagus daytoy a napan iti ngato ti maikadua a kadsaaran tapno ditoy a gandatenna a tumapuak.
Mainaig iti daytoy, kunana a basar iti ina ti maseknan a ni Juliet Lasiste, agtawen ti 40, naasawaan, house keeper ken residente ti nadakamat a Barangay nga agsagsagaba ti mental disorder.
Innayonna a saan a daytoy ti damo wenno umuna a gundaway a naggandat nga agpakamatay ti maseknan.
Kabayatanna, naitaray ti maseknan iti Laoag City General Hospital ngem dagus met laeng daytoy a nakaruar.
