LAOAG CITY – Nakigtot ti maysa a lalaki nga agtawen ti 41 idiay Cordoba, Argentina kalpasan a vasectomy ti inaramidda kenkuana nga imbes a gallbladder surgery.
Idi Pebrero 28, nakaiskedyul para iti gallbladder surgery ni Jorge Baseto iti Florencio Díaz Provincial Hospital.
Nupay kasta, nai-reschedule daytoy ti Pebrero 29. Awan ti ammo ni Baseto a ti operasion nga aramiden kenkuana ti makaigapu ti dakkel a medical malpractice scandal iti intero nga Argentina.
Inbatad ni Baseto nga idi aldaw ti surgery-na, inkabilda daytoy iti stretcher a saanda nga inkumpirmar kenkuana no ania nga operasion ti kasapulanna ken saan a kitkitaen dagiti doktor ti patient chart.
Apaman a nakariing ni Baseto manipud iti operasionna ket napan kinita ti doktor isuna ken binasana ti patient chart ket nakigtot daytoy ken binagaanna iti vasectomy procedure ti naaramid kenkuana imbes a gallbladder surgery.
Naammoan nga iti aldaw ti Mierkoles ket aldaw dagiti vasectomy operation iti Florencio Diaz Provincial Hospital.
Gapu iti daytoy, nag-assume wenno inpagarup dagiti doktor a daytoy ket procedure a masapol nga aramiden ken ni Baseto.
Inisigida a dimmalan iti gallbladder surgery ni Baseto no sadinno kalpasan iti pannakarekobre iti operasion dagusna a dinamag no mabalin daytoy a dumalan iti vasectomy reversal.
Basar kadagiti doktor, mabalin daytoy nga aramiden ngem bassiten ti tsansana a makaputot.
Addan ti dua a putot ni Baseto ngem adda ti baro nga asawana ken planona a maaddaan pay ti baro nga anak.
Kabayatanna, nangalan daytoy ti lawyer ni Baseto ken ad-adalendan no ania dagiti kaso a maipila kontra iti Florencio Diaz Provincial Hospital.
