LAOAG CITY – Naladingit nga inpakaamo ni Ms. Kathleen Manuben iti Brgy.Cabungaan ditoy siudad ti Laoag ti ipupusay ti kaanakan na nga agtawen 23 kalpasan a nadesgrasya.
Segun ken ni Manuben, agarup 7:40 ti rabii idi Disyembre 24 a nagpakada kenkuana ti kaanakan na a pumanaw pay laeng iti banbantayan na nga small business na tapno makadua na ti pamilya ken dagiti barkada na iti nasao a barangay.
Nu pay kasta, kuna na nga alas kwatro itay parbangon idi nagturong iti pagtaengan da ti kapitan ket dita nga inpakaamo na a nadesgraya ken pimmusayen ti kaanakan na.
Immuna iti daytoy, kinumpirmaran ni Police Staff Sergeant Melmar Antonio iti PNP Laoag Traffic Division a pimmusay ti maysa a lalaki nga agtawen a nadesgrasya iti paset ti Mangngato Bridge iti Brgy. Mangngato ditoy siudad ti Laoag.
Kuna a basar iti naiwayat nga imbestigasyon ket agarup alas dos ti parbangon idi Disyembre 24 idi napasamak ti desgrasya.
Inbatad na a napaspas ti taray ti motorsiklo nga inturong ti biktima ken adda iti impluwensya ti nasanger.
Gapu iti daytoy, nagsagaba ti nakana a sugat iti ulo kalpasan a naitupa.
Naitaray ti biktima iti Laoag City General Hospital ngem naideklara a dead on arrival.
