LAOAG CITY – Pimmusay ti maysa a lalaki ken nasugatan ti asawa na kalpasan ti napasamak a pammaltog iti Barangay Caroan iti ili ti Pasuquin.
Segun kenni Police Lt. Manuel Ordonio, ti chief of police ti PNP-Pasuquin, ti biktima a pimmusay ket agtawen ti 38 ken residente dagitoy iti Barangay Poblacion iti nasao met laeng nga ili.
Iti inisyal nga imbestigasyon dagiti kameng ti PNP, naggapo iti Barangay Puyupuyan dagiti biktima ken ti kadawa da a maysa a babai ken naduktalan da nga iti nasao pay laeng a lugar ket agrirririn dagiti agasawa ngem saan da pay a masinunuo ti rason.
Kunana nga idi adda da iti lote a nakapasamakan ti krimen ket intuloy dagiti agasawa ti nagriri iti ruwar ti lugan da ken maipagarop a nakita ti babai nga adda ti bimmaba manipud iti nakamotorsiklo ken daytoy ti nangpaltog kadakuada.
Gapo iti daytoy, nasugatan ti akin-kannigid nga ima ti babai idinto a ti asawa na ket nagsagaba ti uppat a tama ti paltog iti bagi na a rason ti nakatayan na.
Inbatad na a kalpasan ti pammaltog ket napan iti Rural Health Unit (RHU) ti babai ken ti kadwa na a babai ngem inbaga na laeng a nakadasay ti asawa na iti lote kalpasan ti 10 agingga iti 15 a minutos.
Naamoan a ti lote a nakapasamakan ti pammaltog ket 20 agingga iti 30 a metro ti kaadayo na manipud iti national highway.
Maysa a pagsiddaawan da ket no apay a saan a nagderetso ti babai iti PNP tapno ireport ti pamasak ken saan na a dagus nga inbaga a pinanawan da ti asawa na a nakadasay iti nakapasamakan ti pammaltog.
Kuna ni Ordonio a sumagmamano kadagiti kitkitaen da nga anggulo iti daytoy ket posible a sinurot dagiti suspek dagiti biktima a naggapo iti Baramgay Puyupuyan.
Agpapan maisursurat ti damag ket awan pay ti paglawlawagan no anya ti motibo ti pammaltog ngem agtultuloy ti nauneg nga imbestigasyon dagiti otoridad pakairamanan ti SOCO.
Kabayatanna, manamnama a dumalan iti operasyon ti babai gapo iti sinagaba na a sugat iti ima na.
Kalpasan ti sumagmamano nga oras ket natiliwen dagiti otoridad ti suspek ti pammaltog ken nabigbig a ni Dave Peralta y Bayle, agtawen ti 24, awanan ti asawa ken residente iti Barangay Poblacion dos iti nasao met laeng nga ili.
Kuna ni hepe ti nabigbig ti suspek kalpasan nga intudo a mismo ti eye witness wenno ti kadwa dagiti agasawa idi napasamak ti pammaltog.
Innayon ti hepe a ti suspek ket dagus a naglibas kalpasan ti pammaltog ngem naarestar babaen iti hot pursuit opertation.
Iti agdama ket nagtalinaed ti suspek iti kustudiyar ti PNP-Pasuquin ken maisagsaganan ti maipaila a kaso a murder.
