LAOAG CITY – Nagtalinaed ti Gov. Roque Ablan Sr. Memorial Hospital iti maysa a lalaki kalpasan a napaltogan iti Rizal St. a paset ti Brgy. 7 A ditoy ciudad ti Laoag.
Nabigbig ti biktima a ni George Guiang, 25, residente iti nasao a barangay idinto a dagiti suspek ket dua a menor de edad nga agad-adal iti Ilocos Norte National High School.
Basar iti inisyal imbestigasyon ti PNP Laoag, agat-atras dagiti suspek bayat a banbanurburen da ti kotse da idinto a ti biktima ket sumrek iti maysa a bakante a lote, ken maipagarup a pinagsaoan dagiti menor de edad ni Guiang sakbay da a nagpadaya a direksyon.
Nupay kasta, kalpasan ti sumagmamano a minutos ket nagsubli dagiti suspek ken bimmaba ti maysa kadakuada nga adda iti iggem na a paltog ken inpaturong na iti ulo ti biktima ngem inbaot ni Guiang iti iggem na a helmet iti ima ti suspek rason a ti luppo na iti natamaan.
Dagus a naglibas dagiti suspek kalpasan ti nasao a pammaltog.
Narekobre dagiti kameng ti PNP Laoag ti maysa nga empty shell ti saan pay a nadeterminar a paltog iti nakapasamakan ti insidente.
Iti agdama, agtultuloy ti manhunt operation para iti pannakabigbig kadagiti suspek.
