LAOAG CITY – Natiliw ti maysa a lalaki kalpasan a maipagarop nga intutok na ti kutsilyo kadagiti dua met laeng a lalaki iti Barangay 7 iti ili ti San Nicolas.
Nabigbig ti suspek a ni Vanderson Bonilla, adda iti umno a tawen ken residente iti nadakamat a barangay, idinto a dagiti biktima ket ni Jeril John Kebral, 27, maysa a construction worker ken residente iti Barangay 6 kenni Aries John Batoon, 31, trycicle driver ken residente iti Barangay 2 iti nasao nga ili.
Segun kenni Police Major Joseph Baltazar, ti chief of police ti PNP-San Nicolas, napan dagiti biktima iti Barangay 7 gapo ta pasyaren kuma ni Kebral ti forman na nga agnanaed iti paset ti compound a pagnanaedan met laeng ti suspek.
Inlawlawag na a bayat a nakamotorsiklo dagiti biktima ket maipagarop a kellaat lattan sinada ni Bonilla ken intutok na ti kutsilyo.
Ummuna iti daytoy, inrakurak ni Bonilla nga intutok na ti kutsilyo kadagiti biktima gapo iti maipagarop a panagpaburbor ti motorsiklo da iti sangwanan ti balay na.
Kuna pay ni Bonilla a gandaten kuma dagiti dua a biktima ti sumrek iti balay isut gapo na nga induron na motorsiklo ken intutok na ti kutsilyo.
Nupay kasta, kuna ni Baltazar a saan met a basta sumrek dagiti biktima iti compound ngem makitan to iti naun-uneg a panagimbestigar da no anya ti pudno a napasamak.
Rumrumwar a ti suspek ket adda iti impluwensya ti nasanger ken mabalin a nagsagana gapo ta dua ti kutsilyo.
Iti agdama ket adda metten iti kustudiyar ti PNP-San Nicolas ti nadakamat a suspek ken mapilaan ti kaso a grave threat.
