LAOAG CITY – Natiliw ti maysa a lalaki iti naiyuswat a drug buy bust operation idiay Barangay 11, Paco Ramon St. ditoy ciudad ti Laoag babaen ti PDEA, 101 coy RMFB-1 ken PNP-Laoag.
Nabigbig daytoy a ni Melvin Rabi Viernes, agtawen ti 34, naasawaan, tubo idiay Poblacion iti ili ti Pagudpud ngem agnanaed idiay Barangay 10 iti nasao a ciudad.
Naarestar daytoy gapo ti panaglako na ti maysa a bassit plastic sachet a nagalon ti maipagarop a shabu nga agbalor ti sangaribo a pisos iti nagpammarang a police posuer buyer.
Nakumpiskar manipud iti ikot ti suspek ti sangaribo a pisos kas marked money, dua a pidaso a plastic sachet a naglaon ti maipagarop a shabu, maysa a dakkel a sachet a nagalon met laeng ti maatap a shabu, maysa a bassit a sachet a naglaon met laeng ti maipagarop a shabu, lighter, maysa a cellphone, wallet nga addaan ti 286 a pisos ken motorsiklo.
Nagtalinaed met ti suspek iti kustudiyar iti PNP-Laoag bayat a maisagsaganan ti maipila a kaso kontra kenkuana.
