LAOAG CITY – Naidumduma nga eksena ti naimatangan iti Mill Race Marathon iti maysa a runner ti naballigi a nalippasna ti 42 a kilometro a karera kabayatan nga adda ti iggemna a 16-inch a pizza.
Ni Mike Cole, maysa a pizza shop owner ken beterano a marathoner idiay Colombus, Indiana ket saan laeng a basta nalippasna ti marathon, nairaman pay isuna iti kangrunaan a 10 runners kalpasan a nakairekord ti tallo nga oras ken 14 a minuto.
Malaksid iti medalya, nagawid nga adda ti baro a Guinness World Record ni Mike iti titulo a “Fastest Marathon Carrying a Pizza (Male).”
Inadmitir ni Mike a narigrigat ti laban kabayatan nga adda ti iggemna a pizza.
Segun kenkuana, agarup 90 percent daytoy ket narigrigat maidasig iti maysa a regular a panagtaray. Ad-adda a nagbalin a challenging daytoy idi nangrugi a nagtudo isu a kinasapulanna nga ikkan ti proteksion ti pizza box-na.
Saan daytoy ti umuna a gundaway a nakipaset ni Mike iti lumba ti taray.
Iti uneg ti maysa a tawen, nakakumpleto isuna ti 12 a marathons.
