LAOAG CITY – Rugyan ti Land Transportation Office ti agtiliw intono Pebrero 1 kadagiti saan a rehistrado a jeepney, consolidated man wenno saan.
Daytoy ti inrakurak ni Land Transportation Office chief Assistant Secretary Vigor Mendoza II
Inpetteng na a mangrugi intono Pebrero 1 ket saanen a mapalubusan dagiti jeepney driver ken operator a saan a nakapag-consolidate a dumalyasat kadagiti rota da.
Iti agdama, dagiti unconsolidated jeepney ket mabalin da laengen ti agpasada agingga iti Enero 31 ita a tawen.
Naamoan a dagiti jeepney driver ken operator a saan a nakatungpal iti deadline ti consolidation ket maibilang a “colorum” kalpasan ti Enero 31.
Sumuruk-kumurang a 70 a porsiento dagiti driver ken operator iti intero a pagilyan ti napagtitipon.
Inrakurak ni Mendoza nga ado dagiti lote iti nagduduma a rehiyon a nailatang tapno usaren nga impounding area.
Immunan nga inbatad ni Department of Transportation (DOTr) Secretary Jaime Bautista a nagtalinaed a silulukat ti ahensya ken dagiti dadduma pay a maseknan nga ahensya kas iti Land Transportation Office, Land Transportation Franchising and Regulatory Board (LTFRB), ken Office of Transportation Cooperatives (OTC) para iti maysa a diyalogo a pakairamana dagiti grupo ti transportasyon.
