LAOAG CITY – Pinagtutulungan dagiti residente ti Barangay Payak, Bangui, Ilocos Norte nga ikkaten ti naggedday a daga a timmabak iti 20 a metro a provincial road iti nasao a barangay gapo ti agtultuloy a napigsa a tudo.
Daytoy ti kinumpirmaran ni Barangay Chairman Benny Guimod ti Barangay Payak iti pannakiuman ti Bombo Radyo Laoag iti programa a Bombo Hanay Bigtime.
Inbatad na a sinapa da ti nagriing iti laksid nga awan ti kuryente ti barangay ken kabangibang a lugar gapo ti pannakairaman ti poste ti kuryente a natumba tapno maikkat ti daga ken tapno adda ti madalanan dagiti estudyante a sumrek iti pagadalan.
Inusar dagiti residente ti pala ken bareta tapno ikkaten ti naggeday a daga iti kalsada.
Naamoan nga inpatulod pay ti Vice Mayor Denson Garvida ti payloader na tapno tumulong ken mapaalisto ti panagikkat ti naggedday a daga.
Innayon ni Guimod a mabalin nga iti lippas pangaldaw ket maikkat dan ti naggedday a daga iti nasao a lugar.
