LAOAG CITY – Agsublin ti ciudad ti Laoag a makipartisipar iti Tan-ok Festival of all Festival ita a tawen.
Daytoy ti inpakaammo ni Mayor James Bryan Alcid ditoy ciudad ti Laoag.
Inbatad ti mayor a daytoy ti naiget a sagsaganaan ti gobierno lokal ditoy ciudad aglalo iti babaen ti City Tourism Office mainaig iti agbalin a performance ti ciudad.
Innayon na nga iti baet nga ado ti pakakumikuman ti gobierno lokal gapu ta maigiddan pay ti panagfiesta ditoy ciudad intono Pebrero ket i-pressure na ni Mrs. Mary Jane Leaño kas Officer-In-Charge iti City Tourism Office tapno saan a maudi ti agbalin a performance da.
Inpetteng pay ti mayor a masapol a napintas ti agbalin a pabuya da gapu ta maibilang a “comeback performance” ti ciudad, ken uray iti laeng maikadwa a pwesto ti magun-od na ket pakaragsakan da unayen.
Agtalek ti mayor a dakkel ti namnama ti ciudad ti Laoag a makaala ti pwesto gapu ta adda ti pondo ti gobierno lokal a mausar, malaksid pay ti kinatalento dagiti umili.
