LAOAG CITY – Dakkel a tulong ti pannakaipatakder ti kaunaan nga animal pound ditoy probinsia baben iti lokal gobierno ditoy siudad ti Laoag.
Segun ken ni Dr. Samantha Licudine, mangidadaulo ti City Veterinary Office ditoy siudad, apaman a naaramid daytoy ket dakkel ti naitulongna iti panagbaba ti bilang ti kaso ti rabies ditoy siudad.
Inbatadna a manipud iti 48 a kaso iti napalabas a tawen ket nagbalin a 19 ti nairekord ita a tawen.
Malaksid iti daytoy, inlawlawagna a naruayen dagiti natulungan iti opisinada nga ayup tapno makasubli kadagiti pamiliada wenno dagiti mangtartaraken kadagitoy.
Kunana a kangrunaan a natulungan pay ket dagiti walang a taraken nga isuda mismo iti nangtaraken babaen ti panangikabilda iti Laoag City Animal Pound.
Innayonna a baben ti Laoag City Animal Pound ket maysa daytoy nga agbalin nga inspirasion kadagiti amin a local government unit ditoy probinsia para iti ad-adda a pagsayaatan dagiti taraken ken umili.
Immuna iti daytoy, naluktan ti Animal Pound a masarakan iti Barangay Camanggaan ditoy siudad ti Laoag idi Hunio 27 iti napan a tawen.
