LAOAG CITY – Pinadayawan ti lokal a gobierno ditoy ciudad ti Laoag ti Futsal Team a nagkampeon iti tournament idiay Candon City, Ilocos Sur.
Gapo iti daytoy, maragsakan ni Mr. Rick Solomon Marcos, head coach ti nasao a futsal team.
Segun kenni Marcos, ti nadakamat a kompetisyon nagbibinnalubulan dagiti 15 a grupo partikular ti 17 years old below division idinto a ti Women’s division ket nakipartisiparan ti 16 agingga iti 20 a grupo.
Inbatad na a ti kaigetan a kinalaban da ket ti team nga aggapo idiay ciudad ti Baguio a nagbalin a 3rd placer ti Palarong Pambansa.
Inlawlawag na a ti tulbek ti panagballigi da ket ti anus ken kinagaget dagiti atleta nga ag-training.
Naamoan a ti grupo ket namin-duwan a daras a nagkampeon iti nasao a kompetisyon ken isuda pay ti nagbalin a 1st runner up iti R1AA a naisayangkat ditoy probinsya.
