LAOAG CITY – Agtultuloy ti pannakapapintas dagiti pasilidad ti Laoag City General Hospital (LCGH).
Daytoy ket pakairaman dagiti banyo, laboratoryo ken dadduma pay a pasilidad ti ospital.
Segun ken ni Laoag City Mayor James Bryan Alcid, adda dagiti pasilidad ti Laoag City General Hospital (LCGH) a masapol pay a matarimaan, pakairaman dagiti common toilets iti tunggal palapag ti ospital ken dagiti dadduma pay a pasilidad.
Gapu iti daytoy, kunana a kasapulan ti agkiddaw ti Laoag City Government ti kanayonan a pondo para iti pannakatarimaan ken pannakapapintas kaditi pasilidad manipud iti National Government.
Inbatad ni Mayor Alcid a saan laeng a dagiti pasilidad ti napateg a mapabileg ti serbisio ti ospital ngem nudiket pakairamanan pay dagiti serbisio nga ipapaay dagiti doctor, nurse, ken amin nga empleado ti Laoag City General Hospital (LCGH) kadagiti pasiente.
Mainag iti daytoy, kinumpirmaran ni Mayor Alcid a nakagun-od ti isudad ti pondo manipud iti Local Government Support Fund (LGSF) para iti pannakagatang ti maysa a Magnetic Resonance Imaging (MRI) machine, pito a dialysis machines ken maysa nga anesthesia machine.
Kinunana a maiproseso pay laeng dagiti kasapulan a dokumento sakbay a maipadalan iti bidding process dagiti nasao a medical equipment.
Nupay kasta, inlawlawag ti Mayor a maysa pay a baro a CT Scan machine ti mabalin a maipaay iti ospital.
Innayonna a no mainaig kadagiti dadduma pay a proyekto, kalikagum ti administrasion a maurnos ti laboratoryo ken maipasigurado a nasayaat ti panagandar dagiti elevator nga iti agdama ket nasayaat ti kasasaadna.
Kabayatanna, kinunana a no adda dagiti gundaway a makaala ti pondo ti national government ket ipangrunana a kiddawen ti pasilidad para iti nasao nga ospital tapno saan a mausar ti pondo ti lokal a gobierno no sadinno a mabalin a suportaran ti national government tapno maipaay ti ad-ado a pondo para iti social services.
