LAOAG CITY – Nakikoordinar ti City Health Office ditoy siudad ti Laoag kadagiti nagduduma nga ili ditoy probinsya kalpasan nga adda dagiti namonitor da a pasaheros ti GV Florida nga addaan ti GD No. 139 a nagdissaag ditoy siudad itay kallabes.
Daytoy ket kalpasan a nakaluganan da ti PH661 a lalaki a nagpositibo ti COVID-19.
Segun kenni Ms. Christina Ancheta, nurse iti CHO Laoag, adda ti
25 a pasahero a nakaluganan ti PH661 ngem saan da pay a masigurado no agindeg dagiti maseknan a pasahero ditoy siudad rason a nakikoordinar da iti kabangibang a lugar.
Awan met pay ti naireport kadakuada seknan ti lokasyon dagiti nagdissaag a pasahero.
Kabayatanna, awan pay ti namonitor ti CHO no siasinno dagiti nakaluganan ti PH661 kalpasan a nagtransfer daytoy manipud iti nasao a bus ken naglugan iti GMW No. 73 a nagturong iti probinsya ti Cagayan.
Ti GV Florida GD No. 139 ket naggapu idiay Cubao, ken nagbiyahe idi Marso 14, 2020 a nagturong ditoy siudad ti Laoag ken rumrumwar a ti PH661 a maysa kadagiti pasahero ket positibo ti COVID-19.
Iti mainaig a damag, inlawlawag ni Engr. Neil Jose, operations manager ti Florida Bus ditoy probinsya ti travel history ti PH661 a lalaki no sadino a nagturong maseknan iti tapno sukunen na ti asawa na a naggapu idiay Hongkong.
Kuna na a naglugan da ti GV Florida GD No. 139 iti terminal da idiay Cubao agingga a nakadanun da ditoy siudad ti Laoag iti pasado alas siete ti bigat idi Marso 15, 2020.
Inbatad ni Jose nga immakar ti PH661 kadua na ti asawa na iti GMW 73 nga addaan ti biyahe a mapan Santiago, Isabela.
Segun kenni Jose, nagdissaag dagiti nasao a pasahero iti suidad ti Tuguegarao, Cagayan ken maipagaup a naghotel da iti nasao a lugar agingga a nagawid da iti ili ti Tuao, Cagayan.
Marigatan da a mangtrace dagiti nakaluganan ti PH661 gapu ta ti nagluganan da a bus ket passenger schedule a kayat na a sawen ket awan iti reservations na.
Innayon ni Jose a naiquarantine ti PH661 ken ti pamilya na idiay Cagayan.
