LAOAG CITY – Nagun-od iti siudad ti Laoag ken iti ili ti Badoc ti pammadayaw kas Top Performing LGU’s ditoy probinsia iti pannakaipatungpal a nasayaat ti Kalinisan sa Bagong Pilipinas Program ti Marcos administration.
Daytoy ket naipaay kabayatan ti Liga ng mga Barangay National Congress.
Nagun-od dagiti dua a lokal a gobierno babaen iti panagkikinnammayet dagiti opisial ti barangay nga idadauloan ni Liga ng mga Barangay Pres. Rbee Ablan ditoy siudad ti Laoag ken ni Liga ng mga Barangay Pres. Virgilio Calajate iti ili ti Badoc.
Naammoan a ti Kalinisan sa Bagong Pilipinas Program ti Marcos administration ket nairubuat idi Enero 6 ita a tawen.
Kalikagum daytoy a programa a mangbalbaliw dagiti amin a sektor iti siudad ken gobierno tapno ad-adda pay a mapaigetan ti panagtalinaed ken pannakaipaay ti natalged nga aglawlaw.
Gutgutigoten daytoy a programa ti komunidad a makipaset iti pannakaipakaammo iti publiko ti kinapateg ti panangtagiben iti aglawlaw babaen kadagiti nagduduma a programa ken proyekto.
