LAOAG CITY – Nagtalinaed a generally peaceful ditoy ciudad ti Laoag babaen ti kanayun a panagpatrolya, panaglagip iti social media ken panagsusor dagiti kameng ti Philippine National Police kadagiti pasdek negosyo tapno masigurado ti linak, urnus ken talna.
Daytoy ti inbatad ni Police Lt. Sean Francis Bugaoisan, Investigator and Traffic Officer ditoy ciudad ti Laoag.
Inlawlawag na nga ad-adda pay a paigetan da ti agbantay kadagiti pasdek negosyo karaman iti merkado publiko ditoy ciudad ti Laoag tapno maliklikan ti possible nga insidente ti panagtakaw wenno panagsipdot, aglalo ita ta umadanin ti paskua.
Kabayatanna, inpakaammo ni Bugaoisan nga uray dagiti nakaussob ken aggiinom iti igid ti kalsada ket naiget ti panagmonitor da ditoy ciudad ti Laoag.
Kuna na a no adda dagiti matiyempoan da ket ikkan da paylaeng ti makunkuna nga “human consideration” wenno ballaagan da no sadinno a kalpasan iti daytoy ket kanayun dan a rondaan ti lugar tapno masigurado a saanen a maulit nga adda dagiti nakaussob ken aggiinom iti lugar.
Innayo na a no adda paylaeng dagiti saan mangsurot iti pagannuruta kalpasan a naballaagan dagitoy ket isunto metten ti gundaway nga ipaayan da ti citation ticket wenno mapatawan da ti multa.
Mainaig met iti panagvideoke iti rabii, inpasigurado ni Bugaoisan a manmano laeng dagiti mairepreport iti opisina da gapu ta adda met dagiti barangay officials nga umuna a mapan mangsita ken agresponde no adda dagiti kastoy a mapasamak iti masakupan da a lugar.
