LAOAG CITY – Manarimaan ti pannakaipasdek ti Laoag City Tobacco Livelihood Training Center a masarakan iti Barangay 54-B Camangaan ditoy siudad ti Laoag.
Segun ken ni Engr. Shiela Opelac, mangidadaulo ti City Agriculture Office ditoy siudad, daytoy ket dua a kadsaaran a pasdek a napundoan manipud iti Republic Act No. 7171.
Inbatadna nga iti phase 1 ket agarup siam a milyon a pisos a pisos ti pundona idinto nga iti phase 2 ket sumurok tallo a milyon a pisos.
Inlawlawagna a daytoy ket agserbi a training center para kadagiti mannalon ditoy siudad ken pakakitaan kadagiti nagduduma nga accomplishments ti City Agriculture Office.
Kunana a daytoy a pasdek ket isu ti manamnama a baro nga opisina ti City Agriculture Office.
Inayonna a dakkel a makatulong daytoy tapno adda ti pagkamangan dagiti umili nga agkiddaw ti tulong.
