LAOAG CITY – Inrakurak ni Dr. Samantha Licudine ti City Veterinarian ditoy siudad ti Laoag, a mabalin da nga adaptaren ti “no-touch” apprehension a stratehiya tapno maduktalan nu sinno ti akin-taraken dagiti walang nga aso kas ti nagbalin a suhestiyon ni Provincial Veterinarian Dr. Loida Valenzuela.
Kunana a daytoy ket napinpintas nu adaptaren dagiti nagduduma a barangay ditoy siudad nangruna kdagiti saan a nasanay a nalaing tapno agtiliw iti aso.
Nupay kasta, patien ni Licudine a dakkel ti tyansa a pamilyar dagiti agkakabaranggay no siassino met laeng ti makintaraken kadagiti walang nga aso.
Innayonna no iyemplemtar ti City Veterinary Office daytoy a banag ket patienna a napinpintas latta ti panagtiliw iti aso tapno maipaayan ti pagmenamennaan dagiti akintaraken kadagiti walang nga aso.
Maipalagip nga immununan nga inpakaammo ti City Veterinarian nga agtultuloy a bumabbaba ti bilang dagiti kaso ti rabies ditoy siudad ti Laoag.
Segun kenkuana, manipud iti 48 a kaso idi tawen 2023 ket nagbalin a 19 ti nairekord ita a tawen.
Inbatadna a daytoy ket kalpasan iti agtultuloy a pannakaiwayat dagiti vaccination activies iti opisinada.
Inlawlawagna a masapolda a rugian ti pannakaipatungpal kadagiti programa ken aktibidadda gapu ta adu ti barangay ditoy siudad ti Laoag.
Kunana a saan a mailibak nga adda latta dagiti sumagmamano a sakit ti ulo wenno dagiti saan a sumursurot kadagiti pagannurotan.
Innayonna nga adda met ti umdas a suplay ti anti-rabies vaccine iti City Veterinary Office.
