LAOAG CITY – Immapela iti Land Transportation Franchising and Regulatory Board (LTFRB) ni Mr. Fedwinces Rabago, ti auditor ti Laoag-Gabu transport group a saan pay laeng a mapagbalin a modernized jeepney amin dagiti agoperar ditoy probinsya.
Segun ken ni Rabago, narigat para kadakuada nga agpaspasada iti traditional jeepney a makaala ti modernized jeepney.
Kuna na a daytoy ket gapu ta malaksid a nangina ket nakapsot ti pamastrekan iti agdama gubuay ti pandemiya.
Immuna iti daytoy, inlawlawag ni Rabago a basar iti panagcanvas da ti lmodernized jeepney ket umabot iti 18,000 ti masapol a pagbayad iti kada bulan para iti maysa a unit ti jeep a 13 seaters.
Innayun na nga umabot iti 85,000 ti masapol a bayadan ti grupo da iti kada bulan nu bilang magatang ti napagnunumoan a lima a units.
Kuna ni Rabago a basar iti pagannurutan ti LTFRB ket saan a maipaayan ti bileg nga ag-renew dagiti awanan ti modernized jeepney.
Inbatad na a mapugas pay ti provisional authority (PA) nga isu ti mangipalubos nga agoperar dagiti traditional jeepney bayat a maiyur-uray ti magatang a modernized jeepney.
Inpetteng ni Rabago a nu saan a mangngegan ti apela da ket ado ti mapukawan ti pagngedan.
