LAOAG CITY – Balligi ti panangikkat dagiti doktor iti uneg ti lapayag ti maysa a babai idiay Shaanxi Province China ti bassit a diamante.
Iti impormasion, nadlaw ti babai nga adda ti problema iti panagdengegna a nagpaut iti maysa a bulan.
Idi damo ket inpagarupna a ti sakit a marikriknana ket gapu iti minor swelling.
Iti routine cleaning wenno regular a panangdalusna iti lapayagna, naduktalan ti doktor ti rason ti problema ket ti bassit a diamante iti uneg daytoy.
Kalpasan a naala ti diamante, nalagip ti babai nga adda ti napukaw a diamante iti aritosna sakbay a nakarikna ti naidumduma iti lapayagna.
Saan nga inpagarup ti pasiente a mapan iti uneg ti lapayagna ti diamante ken adda iti asideg ti eardrum-na.
Nagasat met ti pasiente gapu ta saan a nangitunda ti impeksion iti lapayagna.
Inrekomendar met dagiti doktor ti routine professional ear cleaning para iti natalged a pannakadalus ken insigida nga agpa-check up no adda ti madi a marikrikna.
