LAOAG CITY – Inbatad ni Police Major Christian Felix, ti deputy chief of police ditoy ciudad ti Laoag nga agtultuloy ti imbestigasyon da mainaig iti napasamak a panagtatakaw iti maysa a pagtaengan iti Barangay 21 ditoy ciudad ti Laoag.
Inlawlawag ni Felix nga iti inisyal nga imbestigasyon da ket naitaray ti suspek ti maysa a laptop nga agbalor iti agarop 35 ribo a pisos, cash a 10 ribo a pisos ken ti cellphone a mapatta-patta nga agbalor iti siyam a ribo a pisos.
Inbaga na a dinadael ti suspek ti tawa ti Comfort Room (CR) ti pagtaengan nga isu ti nagnaan na a napan iti kwarto dagiti aglive-in partner.
Kuna na nga awan dagiti aglive-in partner idi naserrek ti pagtaengan da ken nakigtot da laengen idi masangpetan da a naiwarwara dagiti gamit iti kwarto da pasado alauna itay malem.
Naamoan a dudua laeng dagiti aglive-in partner nga agnanaed iti nasao a pagtaengan ken agpapan ita ket awan pay ti naestablisar ti PNP a suspek napasamak a panagtatakaw.
