LAOAG CITY – Maysa a kompania ti nakabase idiay London ti nakapanunot ti maysa a baro a teknolohia a mabalin nga agpa-obsolete kadagiti refrigerator.
Inpayam-ammo ti Delta H Innovations ti “Cool Can” ti maysa a self-cooling aluminum can iti intero a lubong. Iti simple a panangpindot laeng iti babaen ti lata, lumamiis ti nagian daytoy ti 6 agingga iti 7 degrees Celsius ken agtalinaed a nalamiis ti agarup 45 a minuto a saan nga us-usaren ti kuriente, ref ken yelo.
Lumamlamiis daytoy gapu ta ti base ti lata ket adda ti nakadulin a panangikabilan ti danum. No pinduten ti button, agtennag ti danum iti nagbaetan ti double layered wall ti lata no sadinno nga adda ti espesyal nga asin a mangitunda ti alisto a panaglamiis.
Adda ti indicator ti lata nga agbalbaliw ti marisna manipud iti puraw nga agturong iti asul no umdasen ti kinalamiisna.
Basar iti Delta H Innovations a ni James Vyse, posible a dumanon ti 10 a minuto sakbay a madanon ti inumen ti kalalamiisan a temperatura ngem depende iti klima.
Gapu iti disenio daytoy, nagtalinaed a nalamiis ti inumen ti nabaybayag maidasig iti ordinario a lata.
Naammoan nga uray saan pay daytoy nga available iti merkado, manarimaan ti pannakikoordinaren ti kompania kadagiti dadakkel a brand ti softdrinks ken energy drinks tapno iraman daytoy a teknolohia kadagiti produktoda.
Planoda a padasen ti Cool Can kadagiti music festival iti panawen ti kalgaw.
