LAOAG CITY – Inpakaammo ni Bombo International Correspondent Manny Pascua a dandanin nga makadanun ti lava iti Puna Geothermal Plant idiay Hilo Big Island, Hawaii.
Nupay kasta, nakasangpet metten ti maysa a kemikal nga agdagsen ti 2,000 pounds a maiyaplikar iti nasao a pasilidad tapno maprotektaran manipud iti lava.
Segun kenni Pascua, no inkaso a madadael ti nasao a pasilidad ket posible a ngumato ti singir ti kuryente gapu ta 1/3 iti kuryente ti maus-usar iti sibubukel nga Big Island.
Gapu iti daytoy, naiget a banbatayan dagiti otoridad ti nasao pasilidad.
Immuna a naipasardeng ti operasyon ti ti nasao a planta ken naikkaten dagiti nagduduma a kemikal iti uneg ti planta gapu iti panagpuspuswak ti lava iti Puna district.
Mainaig iti daytoy, saanen a makadalyasat dagiti residente agraman dagiti Pilipino iti highway 132 a mapan kadagiti plantasyon da iti papaya, noni ken sabsabali a mula kalpasan a sinerraanen ti lava.
Kuna ni Pascua nga mabalin da a makapan pay laeng kadagiti plantasyon da no manglikos da iti sabali a kalsada.
Iti mainaig a damag.
Lumawlawa ti ap-apektaran ti lava iti biang ti agrikultura gapu ta adun dagiti nadadael a mula dagiti Pilipino a Papaya, Noni, Lettuce, Samatis, Avocado ken sabsabali pay.
Daytoy ti inpakaammo ni Bombo International Correspondent Manny Pascua manipud idiay Hawaii.
Malaksid iti agrikultura, inbatad ni Pascua nga adda pay ti nasurok 2,000 a taraken a baka iti Kilauea town ngem nupay kasta ket natalged ti kasasaad dagitoy ken agtultuloy a mabanbanatayan.
Kabayatanna, kuna ni Pascua nga agtultuloy ti pannakaibunong ti dust mask kadagiti residente idiay Pahalan town tapno adda ti proteksiyon da manipud iti dapo.
Naamuan nga agarup 3,000 dagiti Pilipino ti agnanaed iti Ka’u District, Big Island.
