LAOAG CITY – Inlawlawag ni Atty. Kidd Castro, Private Lawyer a saan pay a dagus a mapilaan ti maysa a mangisursuro no bilang madangranna dagiti estudiante daytoy kadagiti immuna a panawen.
Segun kenkuana, idi umuna a panawen ket awan pay ti makunkuna a Child Protection Law, Republic Act No. 7610 wenno Special Protection of Children Against Child Abuse, Child Protection Law, Anti-Child Abuse Law ken DepEd Order No. 40 Series of 2012 a panangibasaran kadagiti naglabsing iti pagalagadan.
Gapu iti daytoy, kunana nga awan pay idi ti panangibasaran ti pannakaipila ti kaso kontra kadagiti mangisursuro a mangdangran kadagiti estudiante.
Nupay kasta, iti agdama a panawen ket naiget itan a maipawil ti panangdangran kadagiti estudiante nangruna ket adda dagiti linteg a maipatpatungpal ditoy pagilian para iti proteksion kadagiti ubbing.
Inbatadna a pudno a dakkel ti nagdumaan ti wagas iti panangisuro dagiti mangisursuro kadagiti adalanda idi immuna a panawen maidasig iti agdama nga henerasion.
Innayonna a masapol nga obserbaren ti maximum tolerance para iti panangdisiplina kadagiti estudiante.
Maipalagip nga adda ti maysa nga agad-adal ti Ilocos Norte National High School a maipagarup a pinungot isuna ti maysa a mangisursuro gapu ta awan ti maipakitana a diploma.
