LAOAG CITY – Inpakaammo ni Mayor Michael Marcos Keon ditoy ciudad ti Laoag iti naisayangkat a press conference idi laeng kalman nga adon ti mapaspastrekan ti Laoag City General Hospital gapu iti CT-SCAN nga inyeg ti Department of Health nga initiatibo ti First District Congressman Sandro Marcos.
Segun kenkuana, babaen kadagitoy a ramit ti ospital ket makagun-od ti Laoag City General Hospital ti pammestrekan a makatulong iti pannakaited ti binulan a sueldo dagiti empleado ti nadakmat nga ospital.
Mainaig iti daytoy, saanen a maitantan ti sueldo ken pannakaited ti benipisio dagiti empleado iti nadakamat nga ospital.
Naammoan a gapu iti daytoy ket ininuten a bumangbangon ti Laoag City General Hospital no sadinno ado dagiti umay agaplikar kas empleado iti nasao ga ospital nangruna kadagiti dati a nagbalin nga empleado.
Maipalagip nga inpakaammo ni Mr. Edgar Pascual, City Accountant ditoy ciudad ti Laoag dakkel ti nagbaliwan ti nasao nga ospital gapu ta ngimmato ti binulan a mapaspastrekdan no sadinno a ti target collection ti kada bulan ket 4.6 million ngem nangat-ngato ti 50 a porsiento, bayat a 37 a milyon ti gross income-da iti kada tawen.
