LAOAG CITY – Indauloan ti Laoag City General Hospital ti pannakarambak iti maika-21 a National Buntis Day ditoy siudad ti Laoag.
Segun ken ni Dr. Marsha Lou Wapan, mangidadaulo ti Laoag City General Hospital, ditoy a naipakaammo kadagiti inna no kasano ti kinapateg iti panagsaluad iti bagi tapno agtalinaed a nasalun-at dagiti sikogda.
Inbatadna nga adda ti naidiya a libre a check-up para kadagiti inna ken dimmalan dagitoy iti lecture tapno mailawlawag kadakuada ti rumbeng nga aramidenda ken no kasano a kadakkel a paset ti umno a nutrision ken regular a panagbisita iti doktor iti salun-at dagitoy.
Mainag iti daytoy, kunana a naikkan pay ti gundaway dagitoy a maipakaamo kadagiti inna iti family planning a nasken nga aramidenda para iti nataltalged ken nasaysayaat a masakbayan iti tunggal nagannak ken ubing.
Inayonana a naragsak ti selebrasion gapu kadagiti premio a naipaay kadagiti nakipaset, dua a nagasat nga inna ti napili nga immawat iti libre a 4D Ultrasound session a nangted kadakuada iti gundaway a makakita iti nalawag a ladawan dagiti sikogda.
Kabayatanna, kuna ni Dr. Wapan a ti pannakarambak ti National Buntis Day iti Laoag City General Hospital ket pammaneknek iti agtultuloy a panangikagumaan ti ospital iti panangitandudo iti salun-at dagiti masikog ken dagiti sikogda.
