LAOAG CITY – Nagyaman ti Laoag City General Hospital iti First Congressional Office gapu iti agtultuloy nga ipapaayna a tulong iti nasao nga ospital.
Segun ken ni Dr. Marsha Lou Wapan, mangidadaulo iti nasao nga ospital, apaman nga adda ti naipaay kadakuada a 19.8 milyon a pisos a Medical Assistance to Indigent Patient wenno MAIP Fund idi Septiembre 2022 ket naan-anay a nausarda idi Oktubre 2024.
Inbatadna nga idi Nobiembre 2024 nga adda ti naawatda manen a pundo manipud iti First Congressional Office a dua a milyon a pisos a dandanin a maibos.
Nupay kasta, inpasingkedna nga adda ti manamnama a tallo a milyon a pisos a maipaay iti ospital a manarimaanen ti pannakatratar daytoy iti Sangguniang Panlungsod.
Inlawlawagna a babaen iti daytoy ket dakkel a tulong ken pakabenepisiaran ti naruay nga umili nangruna kadagiti pasiente a marigrigat.
Kabayatanna, nagyaman ti mangidadaulo ti Laoag City General Hospital ti pannakabigbig ti ospital kas maysa kadagiti benepisiario ti Health Facility Enhancement Program no sadinno nga adda dagiti medical equipment kas ti CT Scan, X-ray ken 4D Ultrasound para iti napinpintas a pannakaipadanon ti serbisio medikal.
