LAOAG CITY – Pimmasa iti green viability assessment ti Laoag City General Hospital wenno LCGH ken napagtalinaedna ti 3 star green and safe health facilities gapu iti naurnos pannakamanihir ti basura, climate resiliency, nadalos a pasilidad ken aglawlaw.
Nagun-od pay ti Laoag City General Hospital ti special award for Best practices in Governance babaen iti Integrated Hospital Operations Management Program.
Segun ken ni Dr. Marsha Lou Wapan, Officer In Charge ti Laoag City General Hospital nga adda dagiti programa nga inaramidda kas ti energy conservation, gardening ken dadduma pay tapno magun-od dagitoy a pammadayaw.
Kunana a nakita ti Department of Health ti napintas a pannakaiturong ti ospital ken pannakaimentinar kadagiti nagduduma nga innovation ken program kas ti energy conservation, gardening ken dadduma pay.
Mainaig iti daytoy, nagyaman ni Wapan iti lokal a gobierno ditoy siudad ti Laoag iti agtultuloy a suporta a maipapaay kadakuada.
Kabayatanna, inpanamnamana iti napinpintas pay a serbisio a maipaay kadagiti pasiente nga agturong iti Laoag City General Hospital.
