LAOAG CITY – Makaaramid manen ni Lea Salonga iti pakasaritaan inton Setiembre 4 gapu ta agbalin a kaunaan a Filipino a makaawat iti bituen iti Hollywood Walk of Fame idiay Los Angeles, California.
Umawat ti Broadway icon ti star-na iti kategoria ti Live Performance ken isunto ti maika-2,855 nga star iti iconic a Hollywood Boulevard landmark.
Inyanunsio ti Hollywood Chamber of Commerce ti milestone iti maysa a press release iti opisial a website ti Hollywood Walk of Fame, nga inawaganna ni Lea a “trailblazer” a ti karerana ket nakadanon kadagiti agdengdengngeg iti intero a lubong.
Ti seremonia ket idauluan ti Emmy Award-winning sports and entertainment journalist a ni Sibley Scoles, bayat nga agserbi a guest speaker ti padana a Mulan star ni Lea a ni Ming-Na Wen.
