LAOAG CITY – Sumango ti kaso nga Extortion ni Angelica Joyce Nacino, agtawen ti 22, addaan ti live-in partner ken residente iti Brgy. Salet ditoy siudad ti Laoag ken tubo iti Brgy. Poblacion Uno iti ili ti Pasuquin.
Daytoy ket kalpasan a natiliw babaen ti entrapment operation nga inwayat ti PNP Laoag kalpasan a nagreklamo ni Jamaica Tagalicud, residente iti Brgy. 55-A Barit ditoy siudad ti Laoag met laeng a maipagarup a dawdawatan ti kantidad ti suspek.
Iti exlusibo a pannakiuman ti Bombo Radyo kenni Police Lt. Col. Amador Quiocho, hepe ti PNP Laoag, iyur-uray da dagiti dumatag pay a biktima nga agreklamo kontra ti nasao a suspek.
Inlawlawag na a no bassit laeng ti agreklamo kontra iti nasao a suspek ket posible a makapagpiyansa daytoy ken possible nga agaramid manen iti maikanniwas iti linteg
Innayon ni Quiocho a maipadalan iti inquest proceedings ti nasao a suspek.
Kabayatanna, nagkedked nga agsarita ti suspek iti Bombo Radyo.
Maipalagip a pinilaan ti National Bureau of Investigation ni Nacino ti kaso a syndicated estafa kalpasan nga adda ti agarup iti 80 nga indibidwal ti nagreklamo iti NBI itay napan a bulan ti Nobyembre kalpasan a naalaan dagitoy iti agarup 5 a milyon a pisos.
