LAOAG CITY – Nangidiaya ti League of Municipalities of the Philippines (LMP) Ilocos Norte Chapter iti gunguna iti siasinnuman a makaited ti impormasyon no siasinno ti nangpapatay ken ni Marcos Mayor Arsenio Agustin.
Segun ken ni Dingras Mayor Ergio Valenzuela, Presidente ti Liga, immnanugot amin dagiti kakadua na idi maidasaar ti nasao plano bayat ti naangay nga emergency meeting
Kuna na a 100 a ribo a pisos ti inlatang da para iti nasao nga addang.
Inlawlawag na a ti 50 a ribo a pisos ket kiniddaw da iti national level ti liga da idinto a ti kagudua na ket pagbibingayan da a Mayor.
Mangnamnama ti Liga a babaen iti nasao a kantidad ket makatulong para iti alisto a pannakasulbar ti nasao a krimen.
Maipalagip a napapatay ni Mayor Agustin babaen iti bayat a bisbisitaen na ti proyekto na idiay Bgy. Mabuti iti ili a Marcos itay kallabes.
