LAOAG CITY – Inpakaammo ni Engr. Rommel Batuac, ti Chief Operations iti National Irrigation Administration a ti laeng Bislak River ti nakakitaanda a bimmaba ti lebel ti danom.
Segun kenkuana, no idasig kadagiti dadduma a karayan ditoy probinsia kas iti Pagsan River ken iti kabangibang a probinsia kas iti Ilocos Sur ket ti Bislak River laengen ti adda ti panagbabana iti lebel ti danom.
Inbatadna a daytoy ket gapu iti epekto ti Climate Change a panagpukan kadagiti kaykayo iti kabanbatayan a mangitunda ti dakkel a pannunok kadakuada.
Kunana nga ad-adda a napasaran ti panagtikag ita a tawen no idasig kadagiti napalabas a tawen gapu iti pangta ti El Nino phenomenon.
Mainaig iti daytoy, inlawlawagna a basar iti impormasionda ket bimmaba ti lebel ti danom ngem saan a naapektaran dagiti mannalon.
Kabayatanna, inpakaammona a makikoordinar laeng iti opisinada tapno masupusupan dagiti kangrunaan a kasapulanda iti panagtalon.
