LAOAG CITY – Dakkel ti kompiyansa ni Atty. Butch Catubay, maysa kadagiti legal counsel dagiti innem nga empleyado ti gobyerno probinsyal ti Ilocos Norte a nakadetine iti kongreso a maaprobahan ti insumitir da
a petisyon para ti writ of habeas corpus iti temporaryo a pannakawaya-waya da.
Daytoy ket mainaig pay laeng ti agtultuloy nga imbestigasyon iti maipagarup a misuse of funds manipud ti RA 7171 iti probinsya.
Segun kenni Catubay, idi kuma kalman a matratar ti insumitir da a petisyon ngem saan a natuloy gapu ta awan ti secretary general gapu ta simmurot iti grupo dagiti congressman a nangiwayat ti inspeksyon iti Northern Luzon.
Kuna na a naisumitir da ti petisyon iti panagtaripnong da idi Biernes.
Inbatad ni Catubay a maituloy ti hearing intono Hunyo 8 ken no saan a makaumay ti opisyal ket mangiparul-at ti korte ti contempt order.
Kabayatanna, mangipila pay ti grupo ni Catubay ti motion for bail para kadagiti innem a nakadetine iti kongresso gapu ta arig na a matortorture da.
Innayon ni Catubay a ti court of appeals ti mangtratar iti nasao a petisyon.
