LAOAG CITY – Nagpanawagan ni Senador Loren Legarda nga ikkatenen ti temporary restraining order (TRO) a manglaplapped iti pannakaipatungpal ti kanayunan nga ₱85 a sueldo dagiti minimum wage earners iti Metro Manila.
Segun ken ni Legarda, saan a makauray ti panagbisin, bayad ti renta, plete, bayad ti kuryente ken agas iso nga inpettengna a ti kada aldaw a maitantantan ti nasao a kanayunan a sueldo ket pangparparigat kadagiti mangmangged a Pilipino.
Maysa ni Legarda kadagiti adda iti likudan ti Senate Resolution No. 577, nga mangkidkiddaw nga ikkatenen ti nasao a temporary restraining order (TRO) ken agpanpanawagan ti kabiitan a panawen a maipatungpal ti Wage Order No. NCR-27.
Maipalagip a nangrugi ti immuna a ₱60 a kanayunan a sueldo idi Hulio 25 kadetoy metlaeng a tawen, bayat a ti nabatbati a ₱25 ket naikeddeng a maipatungpal inton Enero 20 inton sumaruno a tawen.
Mainiag iti daytoy, no balligi a maipatungpal ti nasao a gakat ket agbalin a ₱780 ti minimum wage iti non-agriculture sector ken idinto a ₱743 iti agriculture, service, retail ken dagiti babassit a manufacturing establishments iti Metro Manila.
Kabayatanna, idi Hulio 30 idi laeng naudi a bulan, nangiparuk-at ti temporary restraining order (TRO) ti Pasig Regional Trial Court RTC Branch 152 kalpasan ti panangipila ti petision ti Readycon Trading and Construction Corporation ken ti R-II Builders, Inc. a rason ti pannakitantan ti kanayunan a sueldo dagiti minimum wage earners a mangmangged iti Metro Manila.
