LAOAG CITY – Kageddan ti panangipila ti kandidatura iti kina-Mayor idiay Naga City, inlawlawag ni dati a Vice President Ma. Leonor “Leni” Robredo a saanen nga agpaidasig daytoy kas Presidente ti pagilian inton 2028 national elections.
Segun ken ni Robredo, no bilang mangabak isuna kas Mayor ti Naga City, saanna daytoy nga usaren kas “jumpoff point” iti panagpailayon met inton 2028.
Agarup alas-10 ti bigat idi kalman idi simmangpet ni Robredo iti Comelec-Naga City Office a kinadua ni Election Lawyer Atty. Romeo Macalintal ken ti sububukel a line up-na tapno mangipila ti Certificate of Candidacy iti kina-Mayor iti nasao a siudad iti babaen ti Liberal Party nga inawat ni Comelec Officer Atty. Maico Julia, Jr.
Kadua pay ni Robredo a nangipila ti Certificate of Candidacy ti ka-tandem a ni Camarines Sur 3rd district Cong. Gabriel “Gabby” Bordado nga agngudon iti maudi a termino ken kalikagumna met ti Vice Mayoral position idiay Naga City.
Iti baet kadagiti panawagan nga agpaidasig ni Robredo iti nangatngato a posision iti gobierno inton 2025 midterm election, mas pinilina iti kina-mayor ti Naga City a nabayag nga ineggaman ti daydi asawana a ni dati a Department of the Interior and Local Government Secretary Jessie R. Robredo tapno pagserbian met dagiti kailianna.
